Штучны інтэлект збіраецца стаць часткай сям’і, ашуканка падманвае мільёны чалавек і прыдумвае сабе ракавыя захворванні, дэтэктывы спрабуюць вылічыць забойцаў у снежных ландшафтах шведскага курорту.
PALATNO расказвае пра тры новыя серыялы ад Netflix, якія вас захопяць з першых жа хвілін.
«Яблычны воцат» (Apple Cider Vinegar)
Краіна: Аўстралія
Жанр: драма
Серыял расказвае гісторыю Бэл Гібсан, якая расказвае ў інтэрнэце, што ў яе дыягнаставалі рак мозгу, але яна адмаўляецца ад хіміятэрапіі і будзе лячыцца альтэрнатыўнымі метадамі. Паралельна расказваецца гісторыя яшчэ адной дзяўчыны, якая займаецца тым самым: у яе дыягнаставалі рак, але яна адмовілася ад традыцыйнай медыцыны. З часам журналісты высвятляюць, што Бэл Гібсан не толькі падманула людзей пра ракавае захворванне, але і скрала грошы, што ён ахвяравалі на дабрачыннасць.
Гісторыя ў серыяле расказаная паводле рэальнай гісторыі махляркі Бэл Гібсан, што адбылася ў Аўстраліі дзесяць гадоў таму.
«Забойствы ў Оры» (The Åre Murders)
Краіна: Швецыя
Жанр: трылер, дэтэктыў
Гісторыя пачынаецца пасля таго, як афіцэра стакгольмскай паліцыі Ханну кінуў яе партнёр і яе адхілілі ад працы. Яна пераязджае са сталіцы ў домік сястры ў курортным горадзе Оры. Там жа знікае дзяўчына, якую праз некаторы час знаходзяць мёртвай. Ханна аб’ядноўваецца з мясцовым паліцэйскім Даніэлем, каб раскрыць загадку смерці дзяўчыны. Ханна і Даніэль кепска ладзяць, але з часам заваёўваюць давер адзін аднаго.
Серыял зняты па двух раманах з серыі «Забойствы ў Оры» шведскай пісьменніцы Вівекі Стэн.
«Касандра» (Cassandra)
Краіна: Германія
Жанр: драма, хорар
Сям’я з дзецьмі пераязджае ў новы дом за горадам пасля трагічных падзей. Яны спрабуюць пачаць новае жыццё і дапамагчы сабе і дзецям перажыць трагедыю. У новым доме яны знаходзяць старую версію штучнага інтэлекту, які павінен дапамагаць жыхарам адчуваць сябе камфортней. З часам высветляецца, што ў штучнага інтэлекту ёсць свае матывы і жаданні: яна хоча стаць часткай гэтай сям’і.