Гарадскі гадзіннік, тэатр і беларуская школа — гэта і многае іншае з’явілася ў Гродне дзякуючы моцным жанчынам, якія мелі смеласць брацца за складаныя справы ў часы, калі ва ўсіх сферах грамадства панавалі мужчыны. Гарадзенкі рабілі кар’еру ў самых розных сферах і станавіліся знакамітымі далёка за межамі горада. А некаторыя жылі ў Гродне ўсяго некалькі гадоў, а потым да канца жыцця ўспаміналі, як гэты горад на іх паўплываў.
Пра што праект?
Новы праект ад гістарычнага канала Hrodna 11:27 прысвечаны ролі жанчын у гісторыі Гродна.
У дзесяці эпізодах былая супрацоўніца гродзенскага тэатра лялек акторка Настасся Суханосік расказвае пра знакамітых жанчын, лёс якіх розным чынам быў звязаны з Гроднам. Сярод гераінь будуць мастачкі, рэвалюцыянеркі, навукоўцы і нават адна каралева.
Першая серыя прысвечана легендарнай Зосьцы Верас, якая хоць і пражыла ў Гродне толькі чатыры гады, але ўжо ў вельмі сталым узросце так пра яго ўзгадвала:
«Мае думкі часта лятуць у Гродна — да ценяў дзядоў маіх, да ўспамінаў аб шчырай заўзятай працы ў Гродзенскім гуртку беларускай моладзі, дзе я стала на беларускую дарогу».
Далей у праекце будуць аповеды і пра менш вядомых асоб. Адна з мэтаў стваральнікаў цыкла — расказаць пра «польскіх», «савецкіх», «беларускіх» (і не толькі) гераінь, не робячы вялікай розніцы і адзначаючы ўнёсак кожнай у гісторыю.
А што за Hrodna 11:27?
Праект Hrodna 11:27 тры гады расказвае гісторыю аднаго з самых цікавых гарадоў Беларусі. Аўтары праекта праз Telegram, YouTube і Instagram апавядаюць пра факты, асобы, месцы і здарэнні з гісторыі Гродна ад сярэднявечча да 90-х гадоў мінулага стагоддзя.
Назва праекта адсылае да года першай узгадкі Гродна ў летапісе — 1127.
Летась праект выпусціў першы комікс пра гісторыю Гродна — «Гародня ў неверагодных гісторыях яе жыхароў» і першы сезон гістарычна-дэтэктыўнага шоу «Байкі нёманскага дна».