Гэта больш, чым проста мульцікі. Гэта магія, якую нараджаюць цацкі, робаты — ратаўнікі планеты, падарожжы ў свет эмоцый і мараў. Мульфільмы, якія змаглі аб’яднаць пакаленні і застацца назаўсёды ў нашым сэрцы.
PALATNO расказвае пра лепшыя мульцікі ад студыі Pixar.
Змест
«Гісторыя цацак» (Toy Story)
Год: 1995
Гэта першы поўнаметражны анімацыйны фільм студыі Pixar, які паклаў пачатак знакамітай франшызе. «Гісторыя цацак» расказвае пра свет, у якім цацкі могуць ажываць, калі людзей няма побач. Галоўны герой мульціка — каўбой Вудзі, любімая цацка хлопчыка Эндзі. Спакойнае жыццё Вудзі змяняецца, калі Эндзі атрымлівае новую і больш сучасную цацку — касмічнага рэйнджара База Лайтэра. Паміж Вудзі і Базам Лайтэрам узнікаюць канфлікты, бо Вудзі баіцца страціць статус любімца ў гаспадара Эндзі.
На працягу мультфільма нам паказваюць саперніцтва паміж цацкамі, але паступова цацкі пачынаюць працаваць разам, каб вярнуцца дадому пасля шэрагу захапляльных і небяспечных прыгод.
«Карпарацыя монстраў» (Monsters, Inc.)
Год: 2001
«Карпарацыя монстраў» расказвае гісторыю свету монстраў, дзе іх жыццё залежыць ад таго, наколькі моцна яны могуць напужаць дзяцей. Карпарацыя, у якой працуюць монстры, займаецца зборам крыкаў дзяцей, каб пераўтварыць іх у энергію для свайго горада Монстраполіса. Галоўныя героі ў мультфільме — вялікі блакітны монстр Салі і яго лепшы сябар аднавокі монстр Майк Вазоўскі.
У свеце монстраў усё ідзе добра і па плане, пакуль туды выпадкова не трапляе чалавечае дзіця Бу. Монстры лічаць людзей небяспечнымі, таму Салі і Майк хаваюць Бу і спрабуюць вярнуць яе дадому, каб не выклікаць хаос. З часам монстры разумеюць, што смех дзяцей значна мацнейшы, чым іх крыкі.
«У пошуках Нэма» (Finding Nemo)
Год: 2003
Гісторыя «У пошуках Нэма» расказвае пра рыбку Нэма, у якога памерла маці, а яго бацька надта апякае малога сына. Аднак Нэма жадае паказаць незалежнасць: ён заплывае далёка і трапляе ў сетку рыбакоў, і так яго забіраюць у акварыум да дантыста ў Сіднэі.
Бацька Нэма, Марлін, адпраўляецца ў небяспечнае падарожжа праз акіян, каб знайсці сына. Па дарозе ён сустракае Доры — вясёлую рыбку, якая забывае ўсё і становіцца яго партнёрам у прыгодах. А сам Нэма заводзіць у акварыуме новых сяброў і шукае спосаб вярнуцца дадому.
ЧЫТАЙЦЕ ЯШЧЭ:
Чаму казкі братоў Грым такія жорсткія?
Ад «Галаваломкі» да «Арыёну і Цемры». Расказваем пра лепшыя мультфільмы 2024 года
Мультфільмы, праграмы і дзіцячыя шоу па-беларуску на YouTube
«Суперсямейка» (The Incredibles)
Год: 2004
Гэта будзе ідэальны мультфільм для сямейнага прагляду. «Суперсямейка» расказвае гісторыю пра сям’ю супергерояў. Праз шэраг судовых працэсаў і грамадскі ціск усе супергероі вымушаны хавацца і весці звычайнае жыццё. Галоўны персанаж, Боб Пар (Містэр Неверагодны), працуе ў офісе і жыве руцінным жыццём з жонкай Хэлен (Эласціка) і трыма дзецьмі, кожны з якіх мае суперздольнасці.
Боб моцна сумуе па супергеройскіх прыгодах, таму калі яму прапанавалі працу з таямнічай місіі, ён адразу пагадзіўся. Аднак падчас місіі ўсё ідзе не па плане, яго захоплівае злодзей. Сям’я Боба аб’ядналася, каб выратаваць мужа і бацьку.
«Машыны» (Cars)
Год: 2006
«Машыны» стаў яшчэ адным з хітоў Pixar. У гэтай гісторыі ўжо ажываюць машыны. Галоўны герой — гоначнае аўто Макквін, які марыць стаць чэмпіёнам і знакамітасцю. Макквін упэўнены, што можа дасягнуць усяго самастойна, таму з-за саманадзейнасці часта грэбуе іншымі.
Па дарозе на фінальныя гонкі ён спыніўся ў невялічкім мястэчку Радзіятар-Спрынгс і быў вымушаны там застацца. Макквін злуецца і марыць хутчэй вярнуцца да гонак, але з часам знаёміцца з жыхарамі мястэчка і вучыцца, што без сяброў і сапраўдных каштоўнасцей перамога не мае значэння.
«Рататуй» (Ratatouille)
Год: 2007
У гэтым, яшчэ адным легендарным мульфільме ад Pixar зноў ажываюць нечаканыя персанажы. Галоўны герой тут — пацук Рэмі, які марыць стаць шэф-кухарам. Ён захапляецца кулінарыяй і лічыць, што гатаваць можа кожны.
Рэмі выпадкова трапляе ў Парыж у рэстаран свайго куміра кухара Густо. У рэстаране ён пачынае таемна дапамагаць маладому кухару гатаваць стравы, а іх тандэм прыносіць установе поспех. Праблемы пачынаюцца, калі пра сакрэт рэстарану даведаліся ўсе.
«Валі» (Wall-E)
Год: 2008
«Валі» з’яўляецца, напэўна, адным з самых кранальных мульцікаў. Падзеі адбываюцца ў будучыні, калі Зямля стала непрыдатнай для жыцця праз забруджванне. Людзі пакінулі планету і перасяліліся на гіганцкі касмічны карабель, пакуль робаты чысцяць планету. Але прайшлі сотні гадоў, праект праваліўся — усе робаты спыніліся, акрамя аднаго.
Валі застаўся адным робатам, які кожны дзень збірае смецце, захоўвае дзіўныя артэфакты чалавечай культуры. Ён самотны, але аднойчы ўсё змяняецца, калі на Зямлю прыбывае сучасны робат Ева, каб знайсці прыкметы аднаўлення жыцця. Валі выпадкова знаходзіць маленькі праростак, і гэта становіцца знакам таго, што Зямля пачынае аднаўляцца.
«Уверх» (Up)
Год: 2009
Эмацыйная гісторыя пра мары, страту і новыя пачаткі пад назвай «Уверх» захапіла сэрцы гледачоў па ўсім свеце.
Галоўны герой — пажылы ўдавец, які ўсё жыццё марыў разам з жонкай паехаць у падарожжа ў Паўднёвую Амерыку і знайсці міфічнае месца. Але пасля яе смерці мужчына застаецца адзін, яго жыццё напаўняецца смуткам. Аднойчы, калі яму пагражае перасяленне ў дом для састарэлых, ён вырашае ажыццявіць мару, якую яны з жонкай так і не змаглі рэалізаваць.
«Кока» (Coco)
Год: 2017
Мультфільм быў натхнёны мексіканскай культурай і традыцыямі Дня мёртвых. Хлопчык Мігель марыць стаць музыкантам, але ў яго сям’і музыка пад строгай забаронай: адзін з членаў сям’і пакінуў сваякоў з-за музычнай кар’еры.
Падчас святкавання Дня мёртвых Мігель выпадкова трапіў у краіну памерлых, дзе жывуць яго продкі. Ён павінен знайсці спосаб вярнуцца дадому да світанку, інакш застанецца там назаўжды.
«Душа» (Soul)
Год: 2020
Мультфільм «Душа» расказвае гісторыю настаўніка музыкі Джо Гарднера, які ўсё жыццё марыць стаць прафесійным джазавым піяністам. Калі ён атрымлівае шанец выступіць з джазавым гуртам, то адбываецца нечаканае: Джо трапляе ў сур’ёзную аварыю.
Яго душа трапляе ў месца, дзе новыя душы рыхтуюцца да новага нараджэння на Зямлі. Там Джо сустракае душу з імем 22, якая ніколі не хацела нараджацца і не разумела, навошта жыць. Джо становіцца настаўнікам для 22 і паказвае ёй прыгажосць жыцця.