Эх, а што калі стаць рабінзонам, але не ў далёкіх краінах з блакітным морам, а на Палессі падчас паводкі? Ці адчуць, што думаюць кветкі? А ці можам мы атрымаць другі шанец, калі будзем дапамагаць іншым?
PALATNO расказвае пра кнігі, якія варта прачытаць гэтай вясной (ці любой іншай вясной).
Змест
«Таямнічы сад»
Аўтар: Фрэнсіс Эліза Бёрнэт
Раман «Таямнічы сад» пісьменніцы Фрэнсіс Элізы Бёрнэт быў апублікаваны ў 1911 годзе. У ім расказваецца гісторыя дзяўчынкі Мэры, якая пасля смерці бацькоў у Індыі пераязджае ў Англію да дзядзькі ў маёнтак. Спачатку Мэры паказваецца як капрызная і эгаістычная дзяўчынка, але паступова змяняецца. У дзядзькавым маёнтку яна знаходзіць закінуты сад, які разам з новымі сябрамі пачынае аднаўляць.
Раман падыходзіць для чытачоў любога ўзросту. Ён расказвае пра сяброўства, адраджэнне душы і цела і, вядома, другі шанец.
«Клуб аматараў кніг і пірагоў з бульбяных лупінаў»
Аўтар: Эні Бэроўз, Мэры Шафер
Раман быў напісаны Мэры Шафер і дапрацаваны яе пляменніцай Эні Бэроўз. Кніга з’яўляецца эпісталярным раманам (то бок, у выглядзе лістоў) і расказвае пра пасляваенны перыяд у Вялікабрытаніі. Пасля Другой сусветнай вайны галоўная гераіня, пісьменніца Джульет, шукае тэму для новай кнігі.
Джульет перапісваецца з Доўсі Адамсам з выспы Гернсі, якую падчас вайны акупавалі нацысты, а той расказвае пра незвычайны літаратурны клуб. Джульет зацікавілася гісторыяй клуба, так яна пачынае перапісвацца з іншымі ўдзельнікамі, а потым сама прыязджае на выспу. З часам Джульет разумее, што знайшла матэрыял не толькі для новай кнігі, але і месца, дзе хоча жыць.
«Палескія рабінзоны»
Аўтар: Янка Маўр
У аповесці Янкі Маўра расказваецца пра двух падлеткаў, якія вандруюць падчас паводкі па Палессі і выпадкова трапляюць на маленькі астравок. Падлеткі не могуць з яго выбрацца, таму доўгі час выжываюць там: вучацца паляваць і будаваць жытло. Яны чакаюць пакуль вада сыдзе і яны змогуць выбрацца. З часам яны разумеюць, што палескія прасторы выкарыстоўваюць кантрабандысты, у закладніках якіх знаходзіцца міліцыянер. Гэтага міліцыянера падлеткі ратуюць ад забойства кантрабандыстаў, а саміх злачынцаў арыштоўваюць.
Маўр натхняўся «Рабінзонам Круза», але перанёс падзеі ў знаёмыя беларускія мясціны. Пісьменнік абыходзіцца без захаплення экзотыкай далёкіх краін, бо і на радзіме ёсць непаўторная прыгажосць з сапраўднымі выпрабаваннямі.
«Палескія рабінзоны» – гэта не проста прыгодніцкі твор, а кніга, якая выхоўвае цікавасць да гісторыі і прыроды роднага краю, вучыць настойлівасці, мужнасці, уменню знаходзіць выйсце нават у самых складаных сітуацыях. Янка Маўр паказвае, што сапраўдныя адкрыцці і прыгоды могуць адбывацца не толькі ў далёкіх марах, але і ў родных мясцінах – трэба толькі ўмець глядзець на свет з цікавасцю і любоўю.
«Мова кветак»
Аўтар: Ванэса Дыфенбах
Кніга «Мова кветак» ад Ванэсы Дыфенбах спалучае драму і псіхалагічны трылер з элементамі рамантыкі. Па сюжэце кнігі галоўная гераіня, Вікторыя Джонс, усё жыццё правяла ў прыёмных сем’ях і дамах для сірот. Яна не можа давяраць людзям і выказвае пачуцці праз кветкі. Пачынае працаваць у кветкавай краме і адкрывае талент: яна можа знаходзіць кветкі, якія перадаюць эмоцыі. Аднак мінулае дзяўчыны не дае ёй спакою.
«Мэсія з роду Эфраіма»
Аўтар: Мойшэ Кульбак
Мойшэ Кульбак напісаў раман на ідышы ў 1924 годзе, яго падзеі адбываюцца ў ваколіцах Смаргоні ў пачатку мінулага стагоддзя. Па сюжэце ў розных мясцінах Беларусі патаемныя праведнікі рыхтуюць свет да прыходу Мэсіі. Галоўнымі героямі выступаюць людзі, якія адпраўляюцца ў вандроўку, мэта якой да канца не тлумачыцца.
Раман-містэрыя, які стварыў Кульбак, стаў сумессю яўрэйскага фальклору і беларускага духу.
Раман на беларускую мову пераклаў Сяргей Шупа. Пераклад ёсць таксама на польскую і літоўскую мовы.