
PALATNO расказвае пра самыя чаканыя серыялы гэтага красавіка.
Змест
«Аповед служанкі» (The Handmaid’s Tale)
Калі: 8 красавіка
Нарэшце мы дачакаліся фінальнага сезона вельмі моцнага і драматычнага серыялу апошніх гадоў — «Аповед служанкі». Праект стаў адным з самых вядомых антыўтапічных серыялаў.
У серыяле расказваецца гісторыя жанчын, якія трапілі ў таталітарнае грамадства, дзе яны пазбаўленыя сваіх правоў і іх выкарыстоўваюць як інструмент для размнажэння. У фінальным сезоне нам раскажуць, чым скончылася гісторыя Джун Озбарн.
ЧЫТАЙЦЕ ЯШЧЭ: Пяць антыўтопій, якія дапамогуць паглыбіцца ў свет альтэрнатыўнай рэальнасці (ці мы ўжо там?)
«Чорнае люстэрка» (Black Mirror)
Калі: 10 красавіка
«Чорнае люстэрка» вяртаецца 10 красавіка з сёмым сезонам. У гэты дзень выйдуць усе эпізоды сезона, якіх будзе ўсяго шэсць.
Ужо дакладна вядома, што ўпершыню ў шоу, у якім кожны эпізод з’яўляецца асобнай гісторыяй, будзе працяг адной з мінулых серый. Гаворка ідзе пра эпізод USS Callister, у якім здымаліся Крыцін Міліёці і Джэсі Племанс.
«Хітрасці» (Hacks)
Калі: 10 красавіка
«Хітрасці» — вельмі недаацэнены камедыйны серыял — таксама вяртаецца на экраны 10 красавіка. У чацвёртым сезоне чакаецца дзесяць эпізодаў. Спачатку выйдуць дзве серыі, а наступныя восем будуць выходзіць раз у тыдзень. Фінал сезона чакаецца 29 мая.
Нагадаем, што «Хітрасці» атрымаў узнагароду «Эмі».
«Апошнія з нас» (The Last of Us)
Калі: 13 красавіка
Праз два гады на экраны вяртаецца серыял «Апошнія з нас». Мы нарэшце пабачым працяг гісторыі Элі і Джоэла пра пяць гадоў пасля падзей першага сезона. У другім сезоне мінулае Джоэла і Элі даганяе іх: свет, у якім яны жывуць, становіцца ўсё больш небяспечным.
У другім сезоне з’явяцца новыя акцёры: Кэйтлін Дэвер згуляе ролю Эбі, Ізабэла Мерсед — у ролі Дзіны. Знакамітая актрыса Кэтрын О’Хара, якая гуляла маці Кэвіна з «Адзін дома», таксама з’явіцца ў гэтым сезоне «Апошніх з нас».
ЧЫТАЙЦЕ ЯШЧЭ: Што паглядзець з постапакаліпсаў?
«Ты» (You)
Калі: 24 красавіка
Гэта фінальны сезон шоу «Ты», у якім нам расказваюць гісторыю маньяка Джо Голдберга. У чатырох сезонах нам расказвалі пра жанчын, за якімі сачыў і заводзіў адносіны Джо. Шэраг падзей прывялі да таго, што яму прыйшлося ўцячы з Амерыкі ў Еўропу і змяніць сваю асобу. Аднак урэшце ён вяртаецца ў Нью-Ёрк, горад адкуль усё пачалося, каб абяліць сябе. Ці атрымаецца гэта ў Голдберга і ці зможа ён пабудаваць новае жыццё без забойстваў… даведаемся напрыканцы гэтага месяца.
ЧЫТАЙЦЕ ЯШЧЭ:
Шпіёнскія серыялы: падборка для вашых выхадных
Тры новыя серыялы ад Netflix, якія глядзяцца на адным дыханні
Пяць найлепшых экранізацый відэагульняў